ՌԱԶՄԱՎԱՐԱԳԵՏ

Home » ՀՀ ՊՆ ՊԱՀՀ

ՀՀ ՊՆ ՊԱՀՀ

Advertisements

ՀՀ ՊՆ ՊԱՇՏՊԱՆԱԿԱՆ ԱԶԳԱՅԻՆ ՀԵՏԱԶՈՏԱԿԱՆ ՀԱՄԱԼՍԱՐԱՆ

ՀՀ ՊՆ ՊԱՀՀ-ը բացվել է 2016 թ. հունվարի 28-ին: Համալսարանի ստեղծման հիմքում ՀՀ ՊՆ Ազգային ռազմավարական հետազոտությունների ինստիտուտն էր, որը հիմնվեց 2005 թվականին՝ որպես ապագա Համալսարանի հետազոտական բաղադրիչ և կազմակերպական առանցք:

Հայաստանում ՊԱՀՀ-ի հիմնման նախագիծը, այն ժամանակ՝ ՀՀ Պաշտպանության նախարար Սերժ Սարգսյանի հանձնարարությամբ, մշակվել է ՊԱՀՀ-ի հիմնադիր-պետ, Հայաստանի առաջին Ազգային անվտանգության ռազմավարության միջգերատեսչական մշակման գիտական ղեկավար, քաղաքական գիտությունների դոկտոր, պրոֆեսոր, գեներալ-լեյտենանտ (պաշտոնաթող) Հայկ Քոթանջյանի կողմից՝ ԱՄՆ-ի Պաշտպանական ազգային համալսարանում 2003-2004 թթ. իր ակադեմիական ստաժավորման ընթացքում:

Տարածաշրջանում բնույթով եզակի հետազոտական համալսարանի նպատակն է Հայաստանի անվտանգային-պաշտպանական համակարգի արդյունավետության մակարդակի բարձրացումը՝ հետազոտական և կրթական գործունեության կամրջմամբ: Համալսարանի խնդիրների շարքում են տարածաշրջանային անվտանգության դինամիկայի, կիբեռանվտանգության, տեղեկատվական-հաղորդակցային տեխնոլոգիաների, ռազմավարական խաղերի, ինչպես նաև կիբեռթվային ռեսուրսների կառավարման ուղղություններով հետազոտությունների կատարումը: Դրանց հիման վրա Հայաստանի ռազմաքաղաքական ղեկավարությանը ներկայացվում են համապատասխան վերլուծություններ և առաջարկություններ, ինչը նպաստում է պետության ղեկավար կազմի քաղաքական-անվտանգային գիտելիքների ընդլայնման ապահովմանը:

Համալսարանի գիտնական-վերլուծաբանները, միջազգային առաջատար գիտակրթական և հետազոտական հաստատությունների հետ սերտ համագործակցությամբ, ջանում են զարգացնել ու բարձրացնել անվտանգային խնդիրների հետազոտության մակարդակը՝ ի նպաստ Հայաստանի և Արցախի անվտանգության ամրապնդման:

Իր գործունեության ընթացքում ՊԱՀՀ-ը կազմակերպել է մի շարք ռազմավարական-քաղաքական ֆորումներ և համաժողովներ՝ ՄԱԿ-ի, ՆԱՏՕ-ի և ՀԱՊԿ-ի առաջատար մասնագետների ու բարձրաստիճան պաշտոնյաների մասնակցությամբ՝ Հայաստանը այդպիսով դարձնելով Հարավային Կովկասում կառուցողական երկխոսության եզակի ու կարևոր հարթակ աշխարհաքաղաքական տարբեր բևեռների, քաղաքական ու մասնագիտական շրջանակների, մտավոր և ուժային կենտրոնների միջև։

ՊԱՀՀ-ում հրատարակվում են տարածաշրջանային անվտանգությանը վերաբերող կոլեկտիվ մենագրություններ, պաշտպանական-անվտանգային տերմինների բազմալեզու բառարաններ, ինչպես նաև «Հայկական բանակ» և «Աշխատանքային տետրեր» ռազմագիտական հանդեսները:

ՊԱՀՀ-ի կազմում գործում են նաև աշխարհի առաջատար գրադարանների հետ համագործակցող էլեկտրոնային-գիտական գրադարան, ասպիրանտուրա, «Քաղաքագիտություն» մասնագիտությամբ թեկնածուի և դոկտորի գիտական աստիճաններ շնորհող ՀՀ ԲՈՀ-ի 056 մասնագիտական խորհուրդ:

Տես նաև ՀՀ ՊՆ Պաշտպանական ազգային հետազոտական համալսարանի էջը ՀՀ ՊՆ կայքում

Advertisements