Մարտի 30-ին ՀՀ ՊՆ Պաշտպանական ազգային հետազոտական համալսարանում կազմակերպվել էր «Տնտեսական անվտանգության արդի հիմնախնդիրները Հայաստանում» խորագրով կլոր-սեղան քննարկում: Քննարկումը բաղկացած էր չորս հիմնական հատվածներից` «Պետության առաջնահերթությունները տնտեսական անվտանգության ապահովման համատեքստում» (hիմնական զեկուցող` Թաթուլ Մանասերյան, տ.գ.դ., պրոֆեսոր), «Տնտեսագիտական մտքի և տնտեսական անվտանգության պատճառակցման հաստատութենական հիմքերը», (հիմնական զեկուցող` Արման Մարտիրոսյան, տ.գ.դ., դոցենտ), «ՀՀ տնտեսական անվտանգության հիմնախնդիրները 2020թ.-ի արցախյան պատերազմից հետո», (հիմնական զեկուցող` Ազատ Դավթյան, տ.գ.թ.), «Սյունիքի մարզի տնտեսական անվտանգության խնդիրներն արդի մարտահրավերների համատեքստում» (hիմնական զեկուցող` Սառա Մկրտչյան, տ.գ.թ., դոցենտ): Միջոցառումը համադասում էր ՊԱՀՀ-ի Ռազմավարական խաղերի և մոդելավորման խմբի պետ, տ.գ.թ., դոցենտ Գայանե Հարությունյանը:
ՊԱՀՀ-ի պետ գեներալ-մայոր Գենադի Տավարածյանը միջոցառման բացման խոսքում ընդգծեց քննարկման թեմայի կարևորությունը 2020թ.-ի արցախյան պատերազմից հետո պետության նոր ռազմավարական խնդիրների հստակեցման և տնտեսական քաղաքականության վերանայման տեսանկյունից:
Կլոր սեղան-քննարկմանը մասնակցում էին ՊԱՀՀ-ի գիտնական-վերլուծաբանները և ՊԱՀՀ-ում անցկացվող «Պետության ռազմական անվտանգություն» գերատեսչական ակադեմիական վերապատրաստման դասընթացի ունկնդիրները, ովքեր հնարավորություն ստացան լրացուցիչ գիտելիքներ ձեռքբերել դասընթացում ներառված «Պետության տնտեսական անվտանգություն» թեմայի վերաբերյալ և քննարկել այդ առնչությամբ իրենց հուզող հարցերը: Ծավալվեց հետաքրքիր և արդյունավետ քննարկում:
© ՀՀ ՊՆ Պաշտպանական ազգային հետազոտական համալսարան
___________________________________________________________________________________________
ՀՀ պաշտպանության նախարարության Պաշտպանական ազգային հետազոտական համալսարանի «Ռազմավարագետ» բլոգ-կայքի կանոններով՝ դրանում տեղադրված բոլոր նյութերի, «Հայկական բանակ» ռազմագիտական հանդեսի և «Աշխատանքային տետրեր» հավելվածի էլեկտրոնային համարների հեղինակային իրավունքները պաշտպանված են: Նյութերի մասնակի կամ ամբողջական վերարտադրությունն այլ կայքերում կամ ԶԼՄ-ներում առանց «Razmavaraget.wordpress.com»-ին հղման արգելվում է:
___________________________________________________________________________________________
